Litnet

Die Nasionale Kruger Wildtuin met sy ryk dierelewe word beskou as een van die gewildste wildkykplekke in Suid-Afrika. Daar is ’n verskeidenheid diere, groot en klein. Van die olifant wat tot die Elephantidae-familie behoort en as grootste soogdier bekend staan tot die malariamuskiet Genus Anopheles wat net 1cm lank is, alhoewel nie die kleinste.

Hierdie foto’s is warm uit die oond. En is dit lekker om te weet dat hierdie pragdiere tans nog lewend met ons is. U kan gerus tydens die Desember-vakansie daar ’n draai gaan maak om die diere se prag en skoonheid in lewende lywe te waardeer. Die foto’s is geneem oor ’n naweek in Junie, en is die Kruger so volop diere dat ’n kennersoog maklik in twee dae se tyd die Groot Vyf oor en oor kan kiek.

HELLO DAGGA BOY: Hierdie Buffel het nuuskierig opgekyk toe ons nader beweeg. Hy is moontlik uit die trop geskop en loop saam ander “dagga boy’s” rond. Die lewensmerke op sy horings en vel spreek van vele onderonsies met ander bulle en roofdiere. Alhoewel hy geensins aggressief vertoon, moet hy nie onderskat word, hul is een van die wêreld se mees gevreesde diere.  

MODDERBADTYD: Die middag was snikkend warm en hierdie olifant onder kon nie wag om in die water te gaan rondplons nie. Haastig en slurp swaaiend het hy aangedraf gekom, en was ek te dankbaar vir die water tussen ons. Daarna het hy ’n verfrissende vertoning gegee van waterblaas en modderbad. Olifante het eens op elke groot landmassa op aarde voorgekom, maar vandag is daar net die Indiese olifant, die Afrika-bosolifant en die Afrika-woudolifant oor. Suid Afrika is bevoorreg.

KOEDOESTRATEGIE: Let op die pragtige wit chevron van die koedoe tussen die oë. Hulle is die hoogspringkampioen van die soogdiere en sal grasieus sonder ’n aanloop gemaklik oor ’n 2.5 m hoë heining spring. Hierdie een spog met ’n manjifieke paar spiraalvormige horings. Enige trofeejagter se droom.

“KLOU TJOMMA, KLOU!” Snou die bobbejaanwyfie hieronder na haar kleintjie voor hulle laat spat. Volgens die boude-styl kan jy sien tjomma is opreg geteel. Die luiperd is hul aartsvyand wat pandemonium kan veroorsaak en die trop histeries sal laat wegsketter uitmekaar.

OOG VAN DIE AREND: Bo regs vertoon die roofarend sy goudbruin kleur en geel streep langs die snawel teen ’n hemelblou agtergrond. Hul dra die hartseer storie van die kuiken wat eerste uitgebroei word, wat die jonger een gewoonlik doodmaak.

REëNDANS: Onder word die vlerk-vlug van twee reiers uitgebeeld. Kyk net die vere-vingers op die punte van die vlerke wat op die wind sweef – net soos ’n vliegtuig. (Of is dit andersom.) Langsaan is ’n bloureier wat ’n krap gevang het met sy kenmerkende geel snawel. Alhoewel hulle visse kan vang wat tot 110g weeg, verkies hul iets kleiners.   

GOUD IN DIE MOND: Heelwat later die aand het ons hierdie voël onder se eensame beeld vasgevang op prent, terwyl die son alles om hom in goud gekleur het. Misdampe het oor die warm waters begin vorm en ’n misterieuse spookagtige omgewing geskilder.    

KNIBBELENDE KNERSERS: ’n Kameelperd knaag aan ’n doringboom se nuwe blaartjies tussen die dorings wat na die eerste reëns uitloop. Die kameelperd  is die natuur se wolkekrabers en word gesien as die hoogste dier in die wêreld. Om te keer dat die brein bars tydens kop oplig of dat die bloed te vinnig afstroom tydens water drink, het die nekslagaar spesiale kleppe wat die bloed beheer.

KROKODILEILAND: Hierdie seekoei wat uit die water klim trap versigtig tussen al die krokodille. Seekoeie en krokodille verdra mekaar slegs as die watermassa genoegsaam is. Moenie dat die seekoei se komieklike bou of vreedsame voorkoms jou flous nie. Hierdie enorme amfibiese soogdier kan soms woedend storm. Die gaap van die seekoei is in werklikheid ’n aggressiewe gebaar.

VERRASSING IN ’n BOTTEL: Hierdie bobbejaan onder byt ’n plastiekbottel oop wat iemand na hom gegooi het. Opsoek na die nektar wat mense drink vasgevang in houers. Met hul kragtige bou en groot tande kan die mannetjiesbobbejaan tot die dood toe met mekaar veg. Mannetjies lei die bewegings van die familiegroep, inisieer paring en verdedig hoofsaaklik die trop.

LEEUS OP DIE DUINE: Nee, hierdie duin is baie vêr van die see af en is net ’n hoop sand naby aan die Olifantsrivier. Die rustigheid van hierdie trop was vredevol en kon ons kiek en kiek. ’n Goeie lens trek diere heelwat nader, aangesien hierdie trop vêr van die pad af was.

TRIPPE-TRAPPE-TRONE: Hierdie wals van die voël onder op die sementdam is nie verniet nie. Kan jy die akkedis regs onder in die foto se hoek sien? ’n Spel om lewe en dood. Langsaan is ’n  bloukoggelmander. Kyk net na die ongelooflike kamoeflering. Slegs wanneer jy ingestel is op hierdie klein diertjies, sal jy hulle in die Kruger raaksien, aangesien die groter diere soveel meer aandag trek.

VINNIG KOEKELOER: Hierdie hiëna-kleintjie het onder die teerpad in ’n waterpyp weggekruip. Hulle was ’n groot werpsel, maar was ons gelukkig om hierdie een te sien wat moed gevat en kort-kort uitgeloer het. Later die aand toe ons weer daar verby ry was die res van die trop ook daar. Hierdie diere is die vullisverwyderaars van die Wildtuin omrede van hul verstommende eetlus. Selfs menslike oorblyfsels sal opgegrawe en gevreet word.  

DORINGBOOM-VERSIERING:  Die troupant is ’n voël wat met die mooiste kleure spog. Lilakleurige bors met wit strepe en vlerkrande wat ’n helderblou weergee. Hierdie voëls is lief vir die droë en oop bosveld. Hulle het ’n kenmerkende tuimelende pronkvlug wanneer hul met byna toegevoude vlerke val en maak ’n skor-roep-geluid wat glad nie by hulle skoonheid pas nie.

KOLLEKAT-FLUISTERAAR: Dis nie maklik om ’n luiperd te sien oor ’n kort naweek nie. Hierdie een was baie vêr en lyk die omgewing se herfsblare net soos sy kolle. Die lens kon hom egter nader trek en die begeerte om die volle groot vyf raak te kon sien gedurende die naweek, het ’n vervullende en tevrede gevoel meegewerk.

MOENIE DIE RENOSTER VERGEET:  Natuurlik nie. Gebou soos ’n ware oorlogstenk loer hierdie renoster skelm na ons van agter ’n struik. Kliek - het hom! Die renoster se vel kan die kleur van die modder aanneem waarin hy bad, of selfs die kleur van die grond in ’n spesifieke gebied. Mooi kyk – daar is ’n renoster op jou skerm wat hopelik nog die savanna van die Kruger deurkruis. 

GEESTESSKILDERY: En dit was aand, en dit was môre ...

Loof die Here, o my siel!
Wat Uself omhul met die lig soos met ’n kleed,
wat die hemel uitspan soos ’n tentdoek
wat sy solders bou in die water
berge het opgerys, laagtes het weggesak –
na die plek wat U vir hulle reggemaak het...
(Ps 104)

Geniet en waardeer die Skepping
Trienie Mahne